A localidade de Teixeiro celebrou este domingo o seu cuarto de século de vida coa Festa do Cabalo, un evento que este ano rexistrou "cifras récord de asistencia", segundo confirmou o Concello de Curtis. A xornada festiva contou cunha variada programación de probas ecuestres e o aclamado espectáculo Paco Martos Horse Show, recoñecido como unha das mellores exhibicións de doma en Europa.
O alcalde de Curtis, Javier Caínzos, quixo agradecer o "esforzo colectivo" que permitiu acadar este 25 aniversario. "A tenacidade, a constancia, o traballo incansábel e a colaboración de tantas persoas e entidades ao longo destes anos foron a clave para converter a Festa do Cabalo de Teixeiro nun verdadeiro referente a nivel nacional", destacou o rexedor.
Caínzos tamén quixo render unha homenaxe especial ao protagonista do día: "Esta é a festa do mellor amigo do ser humano na nosa terra: o cabalo. Hoxe celebramos a nobreza, a forza e o vínculo único que nos une a este animal tan extraordinario, que é o corazón palpitante desta xornada".
