As máquinas xa comezaron a demoler a estrutura do antigo mercado de Palavea. No seu lugar, o Concello da Coruña construirá unha nova biblioteca cun investimento de 1,3 millóns de euros. As obras de construción está previsto que comecen no vindeiro mes de outubro.
A futura instalación contará con dúas plantas. Incluirá dúas salas de biblioteca, outra sala de usos múltiples, un almacén, un local social e outro destinado á realización de actividades e obradoiros. Segundo declarou a alcaldesa, Inés Rey, "A veciñanza vai poder disfrutar dunha instalación moderna, cómoda e con todas as prestacións necesarias", co obxectivo de que sexa o máis polivalente posible.
Esta transformación responde a unha demanda histórica da asociación de veciños do barrio. O proxecto xa estaba incluído nos orzamentos municipais tanto de 2024 como do ano pasado. Dada a falta de actividade comercial recente, a asociación de veciños xa ocupaba unha parte significativa do espazo do mercado co seu propio local e incluso unha pequena biblioteca, polo que o cambio de uso non suporá unha alteración tan drástica para a comunidade.
