O sindicato maioritario entre os facultativos galegos, O´Mega, manifestou a súa rotunda oposición á intención do Servizo Galego de Saúde (Sergas) de condicionar os incentivos económicos dos médicos á duración da incapacidade temporal dos seus pacientes. Aínda que o colectivo non cuestiona a necesidade dunha xestión rigorosa nin a coordinación coa Inspección Médica, rexeita firmemente que esta medida se converta nunha ferramenta de presión directa sobre os profesionais de Atención Primaria co obxectivo de acurtar procesos de baixa ou emitir altas de forma prematura.
Dende O´Mega lembran que a incapacidade laboral é fundamentalmente un acto clínico-asistencial, e non un mero trámite administrativo nin un indicador económico. Polo tanto, vincular a súa duración á produtividade ou á carreira profesional dos facultativos supón, segundo o sindicato, un conflito ético e profesional inaceptable que atenta contra a independencia do profesional médico. Ademais, a organización considera preocupante que esta proposta contradiga o principio fundamental de que os obxectivos dos Acordos de Xestión deben basearse unicamente en criterios clínicos, sen verse influenciados polo impacto orzamentario.
Por outra banda, O´Mega sinala que moitas baixas médicas se prolongan debido ás propias demoras inherentes ao sistema sanitario, como as longas esperas para probas diagnósticas, consultas especializadas ou intervencións cirúrxicas. Trasladar esta responsabilidade ao médico de cabeceira, argumentan, supón ignorar as deficiencias estruturais da administración. O sindicato subliña que a Inspección Sanitaria xa posúe competencias propias para emitir altas cando o considera procedente, polo que debería asumir estas decisións de forma directa en lugar de delegar a responsabilidade nos facultativos de primaria.
Finalmente, a organización alerta do perigo que supón para a relación médico-paciente que estes perciban que a súa alta médica responde a criterios económicos ou ao cumprimento de obxectivos de xestión. Esta situación expón ao médico de familia como responsable directo dunha decisión condicionada, o que podería incrementar o risco de conflitos, insultos e mesmo agresións nos centros de saúde. Por todo o exposto, o sindicato esixe ao Sergas a retirada inmediata de todos estes indicadores económicos da retribución dos profesionais.
Noutra orde de cousas, o Colexio Oficial de Médicos da provincia da Coruña alcanzou a cifra histórica de 8.010 colexiados, un fito que consolida a súa posición entre as dez corporacións médicas máis importantes de España. Superar os oito mil membros ten, ademais, unha repercusión directa na capacidade de influencia do colexio coruñés no ámbito nacional, xa que, en virtude do sistema de voto ponderado do Consello Xeral de Colexios Oficiais de Médicos de España (CGCOM), pasa de tres a catro votos.
