O labor destes tres traballadores, contratados a xornada completa durante nove meses, céntrase na limpeza de montes, xestión da biomasa e mantemento de espazos naturais. A achega económica para o concello de Malpica ascende a preto de 51.000 euros.
Esta iniciativa da Consellería de Emprego, Comercio e Emigración busca favorecer a contratación de persoas desempregadas e desenvolver actuacións vinculadas á prevención de incendios forestais e á conservación do medio rural, facilitando a experiencia profesional dos participantes.
“"O programa permite combinar a contratación de persoas desempregadas coa realización de traballos vinculados á prevención de incendios e ao mantemento do territorio, facilitando ás persoas participantes a adquisición de experiencia profesional relacionada con estas tarefas."
A nivel provincial, a Consellería de Emprego, Comercio e Emigración destinou máis de 5 millóns de euros na provincia da Coruña, permitindo a contratación de 283 persoas en 82 concellos. Na comarca de Bergantiños-Costa da Morte, 14 concellos recibiron apoio para contratar 56 desempregados, cun investimento superior a 1 millón de euros.
A edición actual de Galicia Suma Talento: Rural Activo introduce a figura do coordinador municipal de prevención de incendios para concellos adheridos ao convenio entre a Xunta e Seaga. Ademais, os municipios afectados por grandes incendios forestais e os adheridos ao convenio poderán manter o mesmo número de contratacións que na convocatoria anterior.
O programa tamén inclúe formación específica para os contratados en materias como prevención de incendios, uso de maquinaria forestal e seguridade no traballo, orientada á súa cualificación profesional.
