O alcalde de Oleiros, Ángel García Seoane, avanzou que se realizarán controis cada 15 días na zona do areal de Portocobo. Esta medida busca reverter a cualificación actual do areal, que figura no censo de augas non aptas para o baño do Servizo Galego de Saúde (Sergas).
A decisión prodúcese tras as declaracións do director de Augas de Galicia, Roi Fernández Añón, quen suxeriu no Parlamento a posibilidade de "segregar" a zona do areal da área portuaria para crear un espazo apto para o baño, diferenciado doutras actividades.
“"Santa Cruz é porto e é praia. Ten un problema, que é que se fixo unha estación de bombeo xigante pola Xunta de Galicia, tres millóns e pico de euros, que quedou con déficit. Cando hay un vendaval e chove moito, as augas da chuvia inexplicablemente van ás augas fecais. Entón desborda, sae polo rego de Santa Cruz e dá contaminado. Non ten nada que ver Portocobo, o porto ou a saída do río. Na saída do río chegan os patos solos para que dea contaminado. Nos outros tramos imos demostrar que non hai contaminación. E vai ser porto e vai ser praia."
O areal de Santa Cruz Porto xa sufriu prohibicións de baño no pasado, concretamente entre 2016 e 2020, debido aos riscos para a saúde asociados á contaminación bacteriana, como gastroenterites ou enfermidades respiratorias.
A deputada do BNG Iria Taibo tamén sinalou no Parlamento a falta de sinalización nos areais afectados, mentres que Roi Fernández Añón recalcou que a competencia sobre a calidade das augas de baño recae no Sergas e a seguridade é municipal.
O alcalde insistiu en que a Xunta xa recibiu "cincuenta veces" a petición de cambiar o punto de mostraxe, que se atopa no río e sempre dará resultados negativos. O Concello, pola súa banda, está a investir en obras no fronte marítimo para solucionar os problemas de afloramento de augas fecais.
