O Concello da Coruña continúa a súa aposta pola xestión sostible dos residuos coa convocatoria para a adxudicación de 80 composteiros domésticos. Estes recipientes, de 300 litros e equipados con aireador e termómetro, teñen como finalidade principal impulsar a recollida separada dos biorresiduos e avanzar cara a unha economía circular.
Poderán optar a estes composteiros as persoas físicas, incluídas as que xa resultaron adxudicatarias dun horto urbano, así como os centros de ensino e as entidades sen ánimo de lucro que dispoñan dun espazo axeitado para a súa instalación durante un mínimo de cinco anos.
“"A participación cidadá na xestión dos residuos urbanos é clave e queremos facilitar a separación en orixe da fracción orgánica, que é totalmente recuperable e útil como compost para o seu aproveitamento en hortas, xardíns e espazos verdes."
A concelleira de Medio Ambiente, Yoya Neira, destacou a importancia da implicación cidadá para a separación dos residuos orgánicos, subliñando o seu valor como compost para o seu uso en hortas e xardíns.
Neira lembrou que esta iniciativa se suma a outras accións do Goberno de Inés Rey orientadas a transformar a xestión de residuos urbanos e a construír unha cidade máis sostible.
O prazo para presentar as solicitudes remata o vindeiro 10 de setembro. Os composteiros adxudicaranse de forma gratuíta e por rigorosa orde de entrada das solicitudes no Rexistro Xeral do Concello.
O Concello comprométese a proporcionar ás persoas e entidades adxudicatarias a información necesaria para o uso correcto dos composteiros e ofrecerá asesoramento para resolver calquera dúbida durante o proceso de compostaxe.
Toda a información detallada e as bases da convocatoria están dispoñibles na web municipal, no teléfono de información cidadá 010 e no enderezo electrónico concellaria.medioambiente@coruna.gal.
