A convocatoria de Participación, resolta en réxime de concorrencia competitiva, repartiu 26 axudas, catro das cales recibiron financiamento en ambas as liñas. A maior parte dos fondos, 34.993 euros, destínase ao desenvolvemento de programas, proxectos e actividades nos barrios, cunhas achegas que oscilan entre os 650 e os 3.518 euros. Estes inclúen actividades formativas, creativas, deportivas e iniciativas comunitarias.
Entre os proxectos subvencionados atópanse iniciativas como «DiverS.O.S. na Agra», «Agra no Ágora», «Facendo barrio», «Gurugú creativo», «Martinete vivo» e «Móvete», ademais de programas de dinamización veciñal e celebracións populares en distintos puntos da cidade. As propostas abranguen cursos de idiomas, cerámica, memoria, ximnasia, así como a celebración do Día das Letras Galegas, magostos, Samaín e Nadal.
A segunda liña de apoio ao movemento veciñal destina 23.648,24 euros a sufragar gastos de funcionamento e mantemento das sedes sociais de sete entidades. As contías concedidas nesta modalidade oscilan entre os 284 e os 6.718,24 euros.
A convocatoria contaba cun orzamento inicial de 60.000 euros e recibiu 28 solicitudes. As axudas financian gastos e iniciativas correspondentes ao período comprendido entre o 1 de xaneiro e o 31 de decembro de 2026.
