O Concello da Coruña informou que o peche é necesario para garantir a seguridade das persoas visitantes e a correcta protección das coleccións. Os traballos forman parte dun proxecto de modernización das instalacións do castelo, que inclúe a renovación da rede eléctrica, a adecuación de canalizacións e melloras na fontanería e no acceso ao recinto.
O concelleiro de Cultura e Turismo, Gonzalo Castro, destacou a importancia da intervención para a conservación e valorización do patrimonio. "Estamos a levar a cabo unha actuación necesaria para adaptar o museo ás necesidades actuais e asegurar as mellores condicións para a conservación do patrimonio e para a futura experiencia das persoas visitantes", sinalou.
O Concello prevé que o peche sexa o máis breve posible e informará puntualmente da reapertura. As obras, adxudicadas á empresa Tecnored, supoñen un investimento superior aos 400.000 euros, financiado con fondos estatais do Ministerio de Industria e Turismo. Esta actuación enmárcase nun programa máis amplo de posta en valor do patrimonio histórico da Cidade Vella.
A pesar do peche do Castelo de San Antón, a Rede de Museos Históricos da Coruña manterá parte da súa programación. Continuarán as visitas guiadas ao Castro de Elviña e as actividades na biblioteca do museo.
Por outra banda, a Torre de Hércules tamén restrinxirá o acceso de visitantes a partir deste xoves 1 de outubro debido a traballos de renovación eléctrica do faro, que se prolongarán ata o 15 de novembro.
