O proxecto de Aprendizaxe Servizo (ApS) “Deseño e Impartición de Obradoiros de Alfabetización Dixital”, promovido polos profesores Joaquín Enríquez, Begoña Álvarez, Jorge Pérez e Simón Villamayor, conta coa participación de máis de 30 estudantes de primeiro curso do grao en Relacións Laborais e Recursos Humanos da Facultade de Ciencias do Traballo do Campus Industrial de Ferrol. A iniciativa enmárcase na materia de Informática Básica.
Neste curso académico 2026/27, o proxecto colabora coa Asociación Sociocultural ASCM Galicia, Movilidad Humana e a Confederación Gallega de Personas con Discapacidad (COGAMI), sumándose tamén Emisoras Municipais Galegas (EMUGA). As sesións de traballo presenciais, que se desenvolverán nas próximas semanas, abordarán o uso das novas tecnoloxías, como a navegación segura por internet, o uso do certificado electrónico ou a elaboración de currículos.
A través desta iniciativa, o alumnado aplica coñecementos adquiridos na aula a situacións reais, mellorando as competencias dixitais dos participantes e integrando a aprendizaxe académica co servizo á comunidade, segundo a metodoloxía de Aprendizaxe Servizo (ApS).
Ademais, parte do alumnado está a gravar, en colaboración con EMUGA, unha serie de podcasts divulgativos sobre alfabetización dixital. Estes contidos emitiranse ao longo de 2027 nas emisoras de radio locais de 25 concellos.
Esta iniciativa forma parte dun convenio entre EMUGA e a Universidade da Coruña (UDC), a través da Oficina de Cooperación e Voluntariado (OCV), para a difusión de proxectos de Aprendizaxe Servizo (ApS), achegando á cidadanía as innovacións docentes do Campus Industrial de Ferrol.
