Carmen Villar, residente na Coruña, comezou a súa protesta este luns, 12 de abril de 2026, ante a Delegación Provincial da Consellería de Educación. A súa intención é permanecer alí ata que se atope unha solución para o seu fillo de acollida, un menor con un 49% de discapacidade que está baixo a tutela da administración autonómica.
O menor, cun grao de dependencia severo, foi acollido de forma permanente hai 12 anos. Durante os cursos 2023-24 e 2024-25, estivo matriculado no centro Agarimo, situado en Arteixo. Non obstante, foi expulsado cautelarmente en febreiro de 2025 por cuestións de seguridade, e dende entón non foi reubicado noutro recurso educativo axeitado.
“"Non me deixaron outra."
A familia denuncia unha situación de “desprotección institucional”, xa que o menor acumula 14 meses sen escolarización. Segundo relatan, o propio equipo educativo do centro Agarimo recoñeceu a “falta de medios” para atender adecuadamente ao menor, o que provocou incidentes que levaron á súa saída. A nai lamenta que “canto máis tempo pasa, máis se agrava a situación. Este ano perdido xa non o recupera”.
En decembro de 2025, un auto xudicial estableceu que o menor debía residir coa súa familia e asistir a un centro de educación especial. Porén, en marzo de 2026, a administración propuxo novamente a súa escolarización no mesmo centro do que fora expulsado, a pesar de que este recoñecera por escrito non dispoñer dos recursos necesarios para a súa atención.
