O Concello de Culleredo anunciou a celebración dun gran concerto gratuíto que terá lugar o venres 3 de xullo. A banda Mojinos Escozíos, liderada por 'El Sevilla', fará unha parada na súa xira no paseo marítimo do Burgo, concretamente na zona da Cros, a partir das 23.00 horas.
O concerto, que se desenvolverá ao aire libre nun espazo con capacidade para miles de persoas, promete ser un espectáculo de rock irreverente onde o humor será o protagonista. A actuación enmárcase nunha intensa semana cultural e de ocio organizada polo municipio.
Dende o mércores 1 ata o domingo 5 de xullo, a poucos metros da zona do concerto, celebrarase o Mercado Templario, que contará cun centenar de postos, animación diversa e oferta gastronómica. Ademais, do venres 3 ao luns 6 de xullo, terá lugar o festival BurgoJazz no Xardín Botánico do Burgo.
“"Este formato foi o seguido xa hai uns anos con Mago de Oz, nunha experiencia moi satisfactoria para incentivar a actividade no municipio."
O alcalde de Culleredo, José Ramón Rioboo, destacou a dinamización que xerará esta fin de semana "repleta de actividade" e que "atraerá a centos de persoas de toda Galicia". O rexedor sinalou que este modelo de eventos combinados xa se seguiu con éxito noutras ocasións, como co concerto de Mago de Oz, obtendo resultados moi positivos para a dinamización local.
