O encontro reunirá profesorado das tres universidades públicas galegas para intercambiar experiencias, boas prácticas e propostas ante os novos retos da docencia universitaria, cunha atención especial ao impacto da intelixencia artificial nas aulas.
A xornada, promovida conxuntamente pola Universidade da Coruña, a Universidade de Santiago de Compostela e a Universidade de Vigo, combinará relatorios, propostas prácticas e presentacións breves de experiencias desenvolvidas polos grupos de innovación docente.
A apertura correrá a cargo do profesor Antonio Fernández-Coca, da Universitat de les Illes Balears, co relatorio “A mí me pasa lo mismo. De la queja compartida a las decisiones que funcionan en el aula de hoy”.
No bloque “InspirAcción: propostas prácticas para o traballo na aula”, a intelixencia artificial será protagonista. Presentaranse achegas como “E agora que a IA pode facelo, que facemos nós?” de Carlos Escudero (UDC) e “¿Docencia e IA? Si, pero con sentidiño...” de Javier Martínez (Universidade de Vigo).
O equipo de Mónica Pérez Ríos da Universidade de Santiago de Compostela presentará a experiencia “Epidequé: achegando a Epidemioloxía á sociedade e ás aulas”.
A sesión da tarde estará dedicada ás pílulas de boas prácticas, espazo para poñer en común experiencias de innovación dos grupos docentes da UDC, USC e UVigo.
A XIGAID tamén contará cunha modalidade de póster virtual a través da plataforma UDCAberta. O prazo para participar nesta modalidade remata o 21 de setembro, mentres que a inscrición presencial estará aberta ata o 12 de outubro.
O programa completo e a información sobre inscricións están dispoñibles na páxina web da XIGAID.
