A iniciativa, que xa ten aberta a súa tempada 2026-2027, busca achegar as artes escénicas e a música a nenos, mozos e familias nos principais espazos culturais de Santiago de Compostela. A presentación oficial contou coa presenza da deputada de Cultura da Deputación da Coruña, Natividade González; a concelleira de Capital Cultural do Concello de Santiago, Míriam Louzao; e o director-xerente do Auditorio de Galicia, Xaquín López.
A programación desglósase en 17 espectáculos no Auditorio de Galicia e no Teatro Principal, complementados con dez actividades de acceso gratuíto na Casa das Máquinas. A oferta abarca diversas disciplinas como teatro, circo, danza, monicreques, música, cinema, clown e acrobacias, pensadas para un público de todas as idades.
“"Hai algo especialmente bonito na cultura en familia: crea experiencias compartidas. Unha función non remata cando se apagan as luces; continúa despois na conversa, nas preguntas dos nenos e das nenas, no que lles sorprendeu, no que lembran e no que os fixo rir."
Natividade González subliñou o valor da cultura como ferramenta para construír comunidade e o dereito da infancia e mocidade a ter contacto coa creación artística. Tamén destacou a importancia da colaboración entre administracións para fortalecer a oferta cultural da provincia e garantir o acceso a públicos diversos.
A Tropa C articúlase con propostas que acompañan as distintas etapas da infancia e mocidade. Mentres os grandes escenarios acollerán teatro, danza, circo e monicreques, a Casa das Máquinas será un espazo de acceso libre para xogar e descubrir novas linguaxes artísticas. Entre as destacadas atópanse 'O bosque de Grimm' da Real Filharmonía de Galicia, espectáculos de circo contemporáneo e propostas específicas para a primeira infancia como 'Marceline' de La Petita Malumaluga (0-3 anos) e 'Únicos' de Date Danza (3-6 anos).
A Casa das Máquinas ofrecerá circo, teatro de rúa e xogos tradicionais de balde, con propostas como 'Xogos Miudiño', 'SororAs', 'Xogos Vaidavai' e 'Xotramu', ademais de '5.0' de Sue Moreno, 'Os Senteito' de Caramuxo Teatro, 'Hoxe si!' de Marta Sempre Arriba e 'Crunch 2' de Muu.
Ademais, o programa Tropa C no Ensino levará a cultura ás aulas, e Tropa C co Apego ofrecerá propostas para medrar e aprender en galego desde os primeiros anos.
