A peza, con idea orixinal, guión e documentación de Carlos Callón e realizada por Nós TV, estrearase o 24 de outubro ás 12h na canle de YouTube da Deputación e en Nós TV. Tamén estará dispoñible na canle 9 de Nós TV e en Movistar+.
A deputada de Igualdade, Sol Agra, destacou a importancia de recuperar e dar a coñecer historias que quedaron fóra do relato histórico, como as de mulleres lesbianas na Idade Media a través das cantigas de amiga. Agra subliñou que o documental contribúe a sacar á luz realidades historicamente invisibilizadas e vinculou a recuperación da memoria histórica coa defensa dos dereitos do colectivo LGTBI+.
A deputada salientou tamén o valor da investigación que achega ao público unha importante descuberta histórica sobre as experiencias e relacións afectivas entre mulleres na Galicia medieval.
Pola súa banda, Carlos Callón agradeceu á Deputación da Coruña o seu compromiso coa recuperación e divulgación da memoria histórica e da diversidade sexual, sinalando a necesidade de combater o silenciamento destas historias.
O documental nace da vontade de rescatar voces do esquecemento e de contribuír a unha visión máis completa da sociedade medieval. 'Cantiga de amiga' pon luz sobre a historia de Sancha Pérez e María Leve, que viviron en Compostela no século XIII, o único caso en Europa cun nome de casal lésbico rexistrado, e tamén sobre María Mateu e as relacións entre soldadeiras.
