A Deputación da Coruña participa este serán na gala do Premio Cociñeiro/a Galego/a 2026, que se celebra no auditorio Mar de Vigo. Ao acto asistirá o vicepresidente, Xosé Regueira, quen destacará a importancia da campaña provincial ‘A paisaxe que sabe’.
Este certame, organizado por Galicia Fórum Gastronómico, estrea unha nova etapa como evento anual, reforzando a súa misión de promover a cociña galega, os produtos de proximidade e as novas promesas do sector.
“"A gastronomía galega vive un momento extraordinario grazas á combinación do enorme talento das nosas cociñeiras e cociñeiros cunha despensa única, que nace do mellor mar e da mellor terra. Temos produto, identidade e creatividade, e iso convértenos nun territorio de referencia."
A participación da Deputación enmárcase na estratexia de converter a provincia nun referente gastronómico, poñendo en valor a sustentabilidade e a identidade culinaria coruñesa. A marca ‘A paisaxe que sabe’ terá un espazo propio onde os chefs Iria Espinosa e Luís Veira, do restaurante con estrela Michelin Árbore da Veira, prepararán propostas como torrada de tinta de lura con bocarte e plancto, ou molete de polbo á galega.
O vicepresidente Regueira subliñou que a través deste espazo búscase “explicar o éxito dunha provincia que sabe transformar o seu territorio, a súa paisaxe e o seu produto nunha experiencia gastronómica de altísimo nivel”. Tamén incidiu na necesidade de apoiar o talento emerxente e visibilizar o sector, destacando que os profesionais da Coruña combinan tradición e innovación para reinterpretar a cultura gastronómica galega.
