A delegada da Xunta na Coruña, Belén do Campo, mantivo unha reunión de traballo co presidente da Federación Española de Empresas de Xardinería (FEEJ), Víctor Pérez, para coñecer os detalles do congreso e abordar liñas de colaboración.
Este evento, que conta co apoio da Xunta de Galicia, converterá Galicia nun punto de encontro europeo de referencia para o sector da xardinería, o paisaxismo e a infraestrutura verde. Celebrarase na Cidade da Cultura o 29 de outubro, enmarcado no European Landscape Contractors Association (ELCA Presidium).
O congreso reunirá a máis de 300 profesionais de máis de 35 países, incluíndo representantes institucionais, empresas, universidades e expertos. O obxectivo é analizar os retos do sector, compartir experiencias e impulsar solucións innovadoras para unha xardinería máis sostible e integrada nas cidades.
O programa inclúe conferencias, mesas redondas, presentacións de casos de éxito internacionais, unha zona expositiva con empresas líderes e espazos de networking e encontros B2B para fomentar novas alianzas.
Ademais, abordouse unha proposta da FEEJ para avanzar na xestión circular da biomasa vexetal xerada polos concellos e empresas do sector. Esta iniciativa, que se porá en marcha este ano coa colaboración da Consellería de Medio Ambiente e Cambio Climático, aposta pola colaboración municipal para depositar restos vexetais e transformalos en compost.
Belén do Campo valorou positivamente esta proposta, xa que se alinea cos obxectivos do Plan Galego de Xestión de Residuos Urbanos (PXRUG) e impulsa modelos de economía circular a nivel local.
