O evento, que tivo lugar durante dúas horas, congregou a alumnado, familias, persoal do centro e veciños nunha xornada de convivencia e compromiso social. Os postos, creados polo alumnado de Infantil, Primaria, ESO e Bacharelato, ofreceron unha ampla variedade de produtos artesanais como marcapáxinas, pulseiras, plantas, obras de arte, papiroflexia, bolsas de tea e velas, entre outros.
A participación do alumnado de ESO foi especialmente destacada, xa que impulsaron novas actividades como pintado de uñas, venda de limonada e palomitas, ou trenzas de fío, que gozaron dunha excelente acollida e contribuíron a un ambiente festivo, sobre todo entre os máis novos.
A música tamén tivo o seu espazo coa actuación da Small Band do CAMP, dirixida polo profesor Wilson Ortega, que amenizou a xornada cun repertorio enerxético.
O resultado de toda esta implicación traduciuse nunha recadación incomparable, que será destinada integramente a Apadan, entidade elixida polo propio alumnado.
Ademais, o Banco Parroquial de Alimentos de Cáritas San Pedro de Mezonzo estivo presente cun posto informativo e de venda de produtos artesanais. Paralelamente, realizouse unha recollida de alimentos non perecedeiros para o Banco de Alimentos Rías Altas. Este último tamén sorteou unha camiseta do Dépor asinada por todos os xogadores entre os doantes, sendo a gañadora Martina, unha alumna de Primaria.
Dende o Liceo La Paz agradeceron a implicación de toda a comunidade educativa e das entidades colaboradoras, consolidando o mercadillo como unha experiencia educativa que fomenta valores como a empatía, a participación e a responsabilidade social.
