O certame, que busca impulsar o uso do galego a través da creación audiovisual, xa ten os seus gañadores para a edición 2025-2026. Os premios foron entregados este martes no Centro Galego de Arte Contemporánea (CGAC) polo conselleiro de Cultura, Lingua e Xuventude, José López Campos, quen louvou o labor dos estudantes como "grandes artífices" destes galardóns que combinan lingua, audiovisual e literatura galega.
A iniciativa, impulsada conxuntamente polas consellerías de Cultura, Lingua e Xuventude e de Educación, Ciencia, Universidades e Formación Profesional, contou coa participación de 18 centros educativos nesta edición.
Na categoría de segundo ciclo de Educación Infantil, o Colexio Princesa de España, de Verín (Ourense), alzouse co primeiro premio, mentres que o Colexio Ponte Carreira de Frades (A Coruña) obtivo o accésit.
Para primeiro e segundo de Educación Primaria, o Colexio Celso Emilio Ferreiro, de Cerceda (A Coruña), foi o gañador, e o Colexio de Guillarei, en Tui (Pontevedra), recibiu o accésit.
O Colexio de Zalaeta, da Coruña, acadou o primeiro premio na categoría de terceiro e cuarto de Primaria, cun accésit para o Colexio O Vicedo, do Vicedo (Lugo).
Finalmente, na modalidade de quinto e sexto de Primaria, o Colexio de Viñagrande-Deiro, de Vilanova de Arousa (Pontevedra), foi recoñecido co primeiro premio, e o Colexio do Feal, de Narón (A Coruña), co accésit.
José López Campos agradeceu o esforzo do alumnado e destacou a calidade dos traballos, que demostran a "enorme capacidade dos máis novos para crear e divertirse en lingua galega". Tamén puxo en valor o labor do profesorado e dos equipos de dinamización lingüística, "fundamentais" para a promoción do galego.
As curtametraxes premiadas e outros traballos participantes poderanse visualizar a través do Portal dá Lingua Galega, na súa canle de Youtube, así como nas seccións infantís e na aplicación Xabarín da Corporación Radio e Televisión de Galicia.
