A intervención prevé unha renovación integral dos elementos urbanos desta rúa, considerada un acceso principal ao centro da cidade, co obxectivo de incrementar os estándares de accesibilidade e seguridade.
O concelleiro de Infraestruturas, Jesús Celemín, destacou que "Rúa a rúa, seguimos a facer unha cidade mellor. Máis amable, máis accesible, máis moderna e máis equipada para mellorar, en definitiva, a calidade de vida da veciñanza de todos os barrios". Engadiu que o proxecto traerá unha "transformación necesaria nunha área moi transitada".
As actuacións inclúen a renovación de pavimentos para maior durabilidade e comodidade peonil, así como o ensanche das beirarrúas. Tamén se levará a cabo unha repoboación vexetal coa plantación de novo arboredo e a ampliación da zona verde existente. A renovación do mobiliario urbano, coa instalación de novos bancos, e a mellora das redes de drenaxe con nova rede de pluviais son outras das intervencións previstas.
Para reforzar a seguridade viaria e a mobilidade, eleváranse os pasos peonís para reducir a velocidade dos vehículos, creando un itinerario peonil completamente equipado nunha zona que presentaba dificultades de accesibilidade.
Este proxecto enmárcase nun plan xeral de humanizacións que o Concello está a executar en todos os barrios, cun investimento total de máis de 83 millóns de euros en proxectos de mellora de contornas urbanas. Actualmente, estanse desenvolvendo outras obras en rúas como Agra do Orzán, Páramo, Ángel Rebollo, Atocha Alta e a praza Manuel Guitián, ademais de proxectos de redesenvolvemento urbano como o de Sagrada Familia.
Proximamente iniciaranse tamén as humanizacións de Antonio Viñes e Vicente Aleixandre, cuxos procesos de licitación xa están en marcha.
