As obras do novo parque infantil do Ventorrillo, na Coruña, xa mostran as primeiras estruturas metálicas que sosterán as catro cubertas. Esta intervención convertirá a área nun equipamento pioneiro na cidade, permitindo o seu uso durante todo o ano, protexido da choiva e do sol.
A alcaldesa, Inés Rey, supervisou o avance dos traballos, acompañada polos concelleiros Jesús Javier Celemín Santos e Nereida Canosa. Destacou que a actuación "representa un paso máis no compromiso do Goberno municipal por dotar todos os barrios de espazos públicos de maior calidade, accesibles e adaptados ás necesidades da veciñanza".
A rexedora lembrou que "o parque do Ventorrillo será un equipamento pioneiro na cidade e responde a unha forma de planificar os espazos públicos pensando no seu uso durante todo o ano". A intervención forma parte do Plan de Barrios 2025-2027.
Para a instalación da cuberta, retiráronse os xogos e o pavimento existentes, realizáronse cimentacións e estanse executando as ancoraxes das estruturas metálicas. Unha vez rematada esta fase, abordarase a renovación integral da área infantil.
O proxecto, cun investimento municipal de un millón de euros, ampliará a superficie do parque de 400 a 730 metros cadrados e incrementará a súa capacidade de 76 a 135 persoas. Incorporaranse novos equipamentos inclusivos e sensoriais, ademais de dous grandes tobogáns.
