A rexedora Inés Rey visitou esta mañá as instalacións do Morriña Festival no peirao de Batería, para supervisar os preparativos da edición que terá lugar esta fin de semana no porto da cidade. Acompañada polo concelleiro de Cultura e Turismo, Gonzalo Castro, a alcaldesa subliñou "o magnífico traballo da organización e de todas as persoas que fan posible un evento destas dimensións".
Rey destacou a importancia do festival para A Coruña, tanto cultural como economicamente. "Morriña é xa unha cita consolidada no calendario musical de Galicia e de España, e para A Coruña supón moito máis ca un festival. Supón cultura, lecer, proxección exterior e tamén actividade económica", afirmou. Engadiu que durante estes días "miles de persoas visitan a nosa cidade, ocupan os nosos hoteis, consumen na nosa hostalaría e coñecen todo o que A Coruña ten para ofrecer".
A alcaldesa tamén resaltou a capacidade da cidade para acoller grandes citas culturais con "todas as garantías", reforzando a imaxe de A Coruña como "unha cidade moderna, dinámica e capaz de acoller grandes citas culturais ao longo de todo o ano".
Nesta edición, o festival reunirá no porto da Coruña a artistas de primeiro nivel como Manuel Turizo, Juanes, Myke Towers, Young Miko, Paul Kalkbrenner ou Maceo Plex. Ademais, incorpórase unha terceira xornada dedicada á música electrónica coa proposta Brunch Electronik.
Inés Rey sinalou que o Morriña Festival tamén serve como "un magnífico punto de partida para as Festas de María Pita", marcando o inicio dunha época "moi especial" para a cidade con "numerosos concertos, actividades culturais e propostas para todos os públicos".
Finalmente, agradeceu o traballo dos servizos municipais, da organización e dos corpos de seguridade, así como a colaboración de Turismo de Galicia, para garantir o desenvolvemento do evento. "Queremos que coruñeses, coruñesas e visitantes vivan un verán cheo de música, cultura e espazos compartidos de encontro e convivencia", concluíu.
