A delegada da Xunta na Coruña, Belén do Campo, xunto co alcalde de Malpica, Eduardo Parga, e a directora territorial da Consellería de Vivenda e Planificación de Infraestruturas, Begoña Freire, visitou as obras na estrada AC-418. A actuación busca dotar este tramo dunha nova senda peonil e reforzar a seguridade para os viandantes.
Os traballos, que comezaron o pasado 31 de agosto e contan cun investimento aproximado de 85.000 euros, rematarán este mes de setembro. A senda conectará o centro de Malpica cos núcleos de Piñeiros e Seixas.
A representante do Goberno galego destacou que esta intervención responde ao compromiso da Xunta de mellorar as estradas autonómicas, especialmente en puntos onde é necesario favorecer unha convivencia máis segura entre o tráfico rodado e os peóns. Sinalou que "esta actuación é un bo exemplo de como pequenas intervencións poden ter un impacto moi importante na vida cotiá da veciñanza".
A intervención desenvólvese entre os quilómetros 14+310 e 14+630 da AC-418, dende a intersección coa AC-414 ata un camiño local onde xa existe unha senda.
A nova senda peonil terá 2,02 metros de ancho e estará adxacente ao arcén. Contará cunha cuneta de seguridade de 60 centímetros e será pavimentada en formigón cunha capa de 14 centímetros coloreada en ton terrizo, cunha extensión total de 320 metros.
Os traballos tamén inclúen o reposicionamento da sinalización vertical, a execución de arquetas e sumidoiros para a drenaxe de augas pluviais, e o desprazamento dunha caseta da rede de abastecemento. A intervención realízase en terreos de dominio público, polo que non se precisan expropiacións.
Belén do Campo subliñou que a Xunta avanza en actuacións pensadas para as persoas, mellorando a mobilidade diaria en condicións máis seguras e cómodas, en liña co "selo Galicia Calidade". Lembrou que o Plan de Sendas de Galicia, na súa segunda fase, prevé executar 120 quilómetros adicionais aos máis de 300 xa construídos, iniciativa recoñecida a nivel europeo.
