O concelleiro de Educación, Formación e Innovación Tecnolóxica, Juan Ignacio Borrego, acudiu hoxe á Delegación de Educación da Xunta de Galicia para entregar un informe detallado sobre as necesidades de mellora estrutural na rede de colexios públicos da Coruña. O documento, elaborado polo Concello, expón as carencias actuais nos centros debido á falta de investimento autonómico.
"Nós facemos todo o que está ao noso alcance e mesmo máis cos recursos limitados que temos. Mais necesitamos que a Xunta faga o seu traballo. Que asuma as competencias que son súas. Trátase da educación dos nosos fillos e fillas", declarou Borrego, quen tamén esixiu un Plan de Rehabilitación Integral para os 29 centros de primaria e educación especial da cidade, que presentan unha antigüidade media de 50 anos.
O concelleiro puxo como exemplo o CEIP Curros Enríquez, un edificio dos anos 30 con "problemas de accesibilidade importantes", e lamentou que, das máis de 300 obras anunciadas pola Xunta para este verán en centros educativos, "non houbese practicamente ningunha en centros de primaria da Coruña". A única actuación programada pola Xunta é a substitución da cuberta do CEIP Sal Lence.
Para abordar a situación, o Concello propuxo á Xunta manter reunións periódicas e trasladar de forma fluída as necesidades dos colexios. Borrego subliñou que o Concello ten un coñecemento "máis exhaustivo" do estado dos centros e ofreceuse a colaborar para "atallar de raíz os problemas que se están acumulando", lembrando que as competencias de cada administración son "claras".
O informe municipal detalla as necesidades dos centros de primaria e enumera as actuacións de mantemento e rehabilitación que o Concello tivo que realizar recentemente, como a reforma do patio do CEIP María Pita ou a renaturalización do patio do CEIP María Barbeito. O Concello destina este ano 1.749.677 € a investimentos en colexios e 2.713.000 euros ao seu plan de mantemento anual, realizando 45 intervencións este verán en 22 colexios.
Borrego remarcou que "as accións de mantemento non poden substituír as obras de mellora e rehabilitación que lle correspondan á Xunta" e que o Concello "non dispón de fondos públicos suficientes para completar as grandes actuacións necesarias". "Os nenos e nenas desta cidade teñen dereito a recibir unha ensinanza en condicións dignas", concluíu.
