A Deputación da Coruña achega 396.600 euros, o 80% do investimento total, para mellorar a eficiencia das instalacións públicas e fomentar o uso de enerxías limpas. Os concellos de menor tamaño recibirán asesoramento técnico para revisar a súa facturación eléctrica, detectar incidencias e identificar medidas de aforro.
O equipo técnico do ITG colaborará coa Oficina de Transición Enerxética da Deputación na análise das facturas eléctricas municipais. O obxectivo é detectar posibles erros e asesorar os concellos nas reclamacións pertinentes. Ademais, os estudos de consumo axudarán a identificar as instalacións con maior marxe de aforro e a priorizar investimentos.
O convenio tamén inclúe a mellora da eficiencia enerxética nos edificios da propia Deputación, empregando sistemas de monitorización do ITG para coñecer a evolución do consumo e o aforro real. Avaliarase a viabilidade de incorporar fontes renovables para reducir emisións.
O ITG aportará a súa experiencia en eficiencia enerxética e integración de renovables. Xunto coa oficina provincial, analizaranse vías de financiamento para os proxectos identificados, tanto nos concellos como nas dependencias da Deputación.
A información recollida servirá para definir a Estratexia Provincial de Transición Enerxética, baseada en datos de consumo. Isto permitirá orientar futuras actuacións e estender solucións a outros municipios da provincia, rexistrando o aforro en kw/hora e as toneladas de CO₂ evitadas.
