O persoal da Residencia de Maiores de Pousada, en Oleiros, alertou ao Concello sobre o grave estado de deterioro que presenta o edificio. Segundo as explicacións facilitadas, a construción sofre importantes danos estruturais e numerosas goteiras que afectan a diferentes espazos da residencia. A situación obriga ao persoal a empregar cubos para recoller a auga e a utilizar medios improvisados, como sábanas, para tentar previr danos maiores.
Ademais dos problemas de conservación, os traballadores tamén sinalaron o mal estado de diversa maquinaria e equipamentos. Tamén denunciaron a falta de determinados equipos de protección individual (EPI) que son necesarios para desenvolver as súas tarefas laborais nas condicións axeitadas de seguridade.
Esta situación na Residencia de Pousada contrasta co discurso da Xunta de Galicia sobre a ampliación da oferta residencial para persoas maiores. O Goberno galego anunciou nos últimos anos diversas obras para incrementar o número de prazas, que, segundo o comunicado, non chegaron a materializarse, agás as executadas pola Fundación Amancio Ortega.
Mentres tanto, os centros que xa forman parte da rede de atención residencial pública presentan problemas de conservación e mantemento que requiren actuacións inmediatas para garantir o benestar das persoas maiores residentes.
