A Universidade da Coruña celebrará o próximo 2 de outubro, na Casa do Alumnado, a cuarta edición das Xornadas de IA e Nesgos de Xénero: oportunidades para a igualdade. Este encontro reunirá a especialistas de diferentes ámbitos para reflexionar sobre os retos que presenta o desenvolvemento e o uso da intelixencia artificial dende unha perspectiva crítica, inclusiva e orientada á igualdade. A xornada está organizada pola investigadora do CITIC Laura Morán e por Teresa Piñeiro, da UDC.
Ao longo da mañá, abordaranse cuestións que van dende a presenza de sesgos cognitivos e de xénero nos sistemas de intelixencia artificial ata o seu impacto en ámbitos como a saúde mental, as redes sociais, a contratación de seguros ou a detección do discurso de odio. O programa permitirá analizar como estes sesgos poden aparecer tanto nos datos cos que se adestran os sistemas como nas decisións relacionadas co seu deseño e aplicacións concretas.
A xornada contará coa participación de Helena Matute, da Universidade de Deusto, que analizará como a intelixencia artificial pode herdar os sesgos das persoas e transmitilos a quen interactúa con ela, influíndo nas decisións humanas e amplificando determinados prexuízos.
Pola súa banda, Eurídice Cabañes proporá unha reflexión sobre as bases culturais e sociais dos sistemas de intelixencia artificial actuais, cuestionando a visión tecnolóxica dende perspectivas patriarcais, extractivistas e coloniais e defendendo o deseño dende conceptos como a reciprocidade, a rexeneración e os coidados.
A relación entre intelixencia artificial e saúde mental será outro dos eixos. Ana Freire, da Universitat Pompeu Fabra, presentará un caso de estudo sobre a detección de sinais de anorexia nerviosa nas redes sociais mediante aprendizaxe automático, analizando como os sesgos poden introducirse nos datos ou no deseño dos problemas.
O programa complétase coa sesión FACTOR[IA] UDC · investigacións en 10’, onde investigadores da Facultade de Informática presentarán liñas de investigación en intelixencia artificial. Inclúense propostas sobre a lingua galega e minorizada, como a de Lucía Álvarez, quen explicará o desenvolvemento de ferramentas para detectar discurso machista e acoso en galego nas redes sociais.
Tamén participará Paloma Piot, investigadora do CITIC, quen abordará os sesgos demográficos na detección do discurso de odio e analizará como a intelixencia artificial pode contribuír á corrección destes sesgos.
No ámbito da contratación de seguros, Rafael Colina examinará os riscos de que a IA introduza diferenzas de trato inxustificadas entre clientes, destacando a dificultade para detectar prácticas discriminatorias cando as decisións son automatizadas.
Finalmente, a mesa redonda «Cara unha IA máis igualitaria», moderada por Laura Castro, permitirá pór en común as diferentes perspectivas abordadas.
Con esta cuarta edición, as xornadas consolidan un espazo de encontro entre investigación, tecnoloxía e sociedade para construír sistemas de intelixencia artificial máis conscientes das desigualdades e respectuosos coa diversidade.
