A cidade da Coruña acolle dende hoxe, luns 28 de setembro, a campaña itinerante 'Cambia el filtro', unha iniciativa da Fundación MAPFRE coa colaboración da Federación Galega de Enfermidades Raras e Crónicas (FEGEREC). O obxectivo principal é concienciar á cidadanía sobre os prexuízos que condicionan a percepción das persoas con discapacidade intelectual ou con enfermidades raras.
A concelleira de Benestar Social, Participación e Igualdade, Nereida Canosa, participou na presentación da campaña no Parrote, destacando a importancia de coñecer ás persoas antes de xulgar as súas capacidades. "Ás veces unha etiqueta condiciona o que esperamos dunha persoa, mesmo antes de escoitala. Cambiar esa mirada comeza por achegarnos e coñecela", sinalou.
Canosa tamén subliñou o valor da inclusión e a participación activa das persoas na toma de decisións sobre o seu propio proxecto de vida, así como a importancia de contar cos apoios necesarios para continuar realizando actividades significativas. Agradeceu o labor de FEGEREC e dos seus profesionais e familias na visibilización desta realidade.
A Coruña é a única parada galega desta ruta que percorre 20 cidades de 11 comunidades autónomas. A unidade móbil da campaña estará aberta ao público no Parrote hoxe, luns 28, e mañá, martes 29, no paseo de Alexandre Bóveda. O acceso é gratuíto e o horario é de 10:00 a 14:00 e de 15:00 a 18:00 horas.
A unidade móbil ofrece unha experiencia interactiva baseada en historias reais, invitando os visitantes a reflexionar sobre os seus propios prexuízos. Complétase cun punto de información de FEGEREC e o mural dixital Miradas que suman.
A concelleira animou a cidadanía a visitar a unidade móbil e a dedicar tempo a escoitar as experiencias das persoas protagonistas, contribuíndo así a unha Coruña máis inclusiva e accesible.
