A Deputación da Coruña colabora na celebración da II Feira das Industrias Culturais e Creativas, CoruñArt, que se celebrará o vindeiro 7 de novembro no Fórum Metropolitano da Coruña. O evento, de entrada gratuíta, busca fortalecer o sector cultural, fomentar a colaboración profesional e achegar a creación artística á cidadanía.
A deputada de Cultura, Natividade González, destacou na presentación da iniciativa a importancia de apoiar proxectos que recoñecen a cultura como un sector estratéxico, xerador de emprego e actividade económica. "Apoiar as industrias culturais e creativas é apostar polo talento, pola innovación e pola capacidade da cultura para dinamizar o territorio", sinalou.
“"Desde a Deputación queremos contribuír a que as persoas profesionais do sector conten con espazos para experiencias, establecer alianzas e dar visibilidade ao seu traballo."
A feira manterá a súa vocación de reunir profesionais, empresas, entidades e público arredor das diferentes disciplinas artísticas e culturais. Nesta edición, reforzaranse os encontros profesionais 'one to one' para facilitar contactos e oportunidades de negocio.
O evento contará coa colaboración da Academia Galega do Audiovisual, que achegará obras gañadoras dos Premios Mestre Mateo, e da Escola de Imaxe e Son da Coruña, para visibilizar novas xeracións de profesionais.
Ademais, está aberto o prazo para que empresas e entidades sen ánimo de lucro vinculadas ao sector cultural soliciten un espazo expositivo para presentar os seus proxectos, produtos e servizos.
