O primeiro tenente de alcaldesa e voceiro municipal, José Manuel Lage, informou hoxe sobre as decisións tomadas na Xunta de Goberno Local. Entre os asuntos aprobados destaca a formalización da encomenda á empresa municipal EMVSA para a xestión da piscina municipal climatizada cuberta de San Amaro. Esta instalación, xestionada ata agora polo Club do Mar, pasará a mans municipais de mutuo acordo co club, co obxectivo de manter as condicións e a prestación do servizo.
Lage sinalou que o Concello asume importantes investimentos para mellorar o recinto. "Cremos que é a mellor solución para garantir que este proceso teña efectos positivos para as persoas usuarias e non supoña un problema para o club", afirmou. O investimento previsto para a xestión da piscina estímase en 86.000 euros para 2026, 324.000 euros para 2027 e 198.000 euros para 2028, co fin de "que esta poida dar incluso un servizo en mellores condicións do que o fai actualmente".
En canto á Cidade Deportiva da Torre, adxudicouse a segunda fase de reforma dos vestiarios cun investimento de máis de 654.000 euros. Esta intervención súmase á primeira fase, que xa superou os 850.000 euros. O proxecto prevé a creación de dous novos vestiarios para equipos mediante unha reordenación dos espazos, atendendo ás demandas dos usuarios. A reforma inclúe materiais de alta resistencia, climatización, renovación de aire, fachada ventilada, illamento térmico e melloras na cuberta.
Ademais, aprobouse unha modificación do contrato de servizo de conserxería nos edificios deportivos municipais para ampliar as horas de prestación en 2.030,25 horas anuais. Esta medida busca garantir o correcto desenvolvemento das actividades e adiantarase a hora de apertura en varios polideportivos. O investimento total anual ascenderá a 5.358.070,13 euros.
Finalmente, deuse luz verde á proposta de acordo para a liquidación do convenio co Ministerio de Defensa sobre a propiedade denominada «Acuartelamento da Grela» ou Cuartel de Automóbiles. O obxectivo é axilizar o proxecto de reparcelación deste espazo, que o Concello prevé urbanizar para albergar dependencias que faciliten a loxística do transporte urbano. O proxecto contempla case 22.000 metros cadrados para cocheiras e outros servizos públicos.
