As obras dos Cantóns na Coruña forzaron o cambio da parada de bus interurbano, afectando a preto de 300 autobuses e unhas 2.000 persoas cada día. Tras pouco máis dunha semana en funcionamento, os condutores xa denuncian serios inconvenientes.
“"Eu non sei quen ideou iso nin en que se basea... sentado no volante, os perigos que vexo aí... hai veces que tes ángulos mortos e non sabes o que hai."
A principal preocupación céntrase na seguridade. A nova localización introduce un elevado número de autobuses nun espazo máis peonil, o que xera unha convivencia perigosa. Os condutores sinalan a dificultade para realizar manobras con seguridade debido aos pasos de peóns, a presenza de viandantes, patinetes e bicicletas, así como os ángulos mortos e a presenza de taxis.
Ademais dos riscos de seguridade, xorden problemas operativos. A nova parada é máis reducida, e os axentes da autoridade urxen aos condutores a non permanecer parados, o que ocasiona que algúns autobuses saian antes da súa hora, prexudicando aos usuarios. Outra carencia importante é a falta de aseos para os condutores, un servizo co que contaban na anterior parada e que agora non teñen dispoñible.
“"A min que alguén me diga cando eu teña necesidades de ir ao baño, como o fago. Eu e os meus compañeiros e compañeiras. É que non somos robots."
Ante esta situación, os representantes dos condutores solicitan unha mesa de diálogo coa Xunta de Galicia e os concellos da área para abordar as problemáticas. Subliñan a necesidade de adaptar as liñas existentes e de escoitar a experiencia dos profesionais, xa que a realidade diaria difire moito da planificación teórica.
