A sección cuarta da Audiencia Provincial da Coruña impuxo as costas procesuais a un home que recorreu unha sentenza de divorcio co obxectivo de evitar o pagamento dunha pensión compensatoria de 1.200 euros ao mes á súa exmuller. O tribunal confirma de xeito íntegro que o home debe continuar aboando dita contía debido á situación de saúde e á falta de ingresos da demandante, quen dedicou un "moi longo tempo" ao coidado da familia.

A sala considerou que o recurso presentado polo home "só pode cualificarse de temerario", dado que as súas alegacións se apoiaban nun acordo alcanzado polos cónxuxes para regular temporalmente as cargas familiares previas á demanda de divorcio, o cal fora homologado xudicialmente en Suíza.

A resolución xudicial detalla as circunstancias que rodearon aquel pacto inicial. Segundo recolle o texto, o acordo subscribiuse nun momento no que o home abandonou a súa esposa, deixándoa "nunha situación de grande vulnerabilidade e risco en Suíza". Aquela situación obrigou ao fillo de ambos os dous a socorrer á súa nai, quen se atopaba "enferma e sen traballo nin cartos" ante un grave risco de precariedade.

As maxistradas conclúen que o feito de que a separación se producise antes de solicitar as medidas provisionais previas ao divorcio non é un obstáculo para desestimar as pretensións do home. A sala salienta que a muller "non tiña capacidade de reacción" e precisaba de forma urxente a axuda do seu fillo por carecer de calquera tipo de ingreso co que atender as súas necesidades básicas, como era a súa propia saúde.