Un operativo contra a extracción ilegal de recursos mariños na costa da Coruña, levado a cabo entre o 14 e o 17 de xullo, saldouse coa tramitación de 48 denuncias e o comiso de máis de 112 quilos de percebe. Os axentes identificaron un total de 53 persoas.
A intervención foi realizada pola Unidade de Policía Nacional Adscrita (UPA) de Galicia e efectivos do servizo de Gardacostas de Galicia, coa colaboración da Confraría da Coruña e axentes da sede provincial da UPA na cidade. Ademais do marisco, interveuse diverso material como pranchas de poliespán e equipamento de mergullo profesional.
O marisco comisado foi doado a un centro benéfico da Coruña tras a preceptiva análise sanitaria. A práctica do furtivismo, segundo fontes da confraría, supón un espolio do medio natural e unha competencia desleal para os profesionais do sector, xa que facilita o acceso a zonas de difícil alcance e a obtención de exemplares de maior tamaño.
Un dos operativos requiriu a presenza policial a bordo dunha embarcación para apoiar o Servizo de Gardacostas, debido á actitude hostil dalgúns furtivos que se negaban a identificarse nunha zona insular de acceso complexo.
Estas actuacións enmárcanse no reforzo da loita contra o furtivismo e na protección dos recursos mariños que leva a cabo a UPA, en colaboración coa Consellería do Mar e as confrarías de pescadores. O traballo céntrase en dispositivos dirixidos a impedir a actuación dos furtivos en todas as fases: extractiva, venda, transporte e distribución.
