A localidade de Abegondo acolleu este domingo a tradicional Mostra de Cans de Caza, un evento que xa suma 27 edicións e que se converteu nun referente para criadores e afeccionados de toda Galicia. A finca As Quintás foi o escenario onde se deron cita os mellores exemplares desta modalidade cinexética, nunha xornada organizada en colaboración coa Asociación de Cazadores de Abegondo.
A xornada culminou coa entrega de galardóns nas distintas categorías, avaliadas por un xurado experto. O premio ao Mellor Can da mostra foi para Capitán, un exemplar da raza Gascon Saintongeois procedente de Antas de Ulla, cuxo propietario é García. Na categoría de Caza Maior, o triunfo foi para Amalia, unha Sabuxa Española propiedade de Pepe Leira, chegada dende o concello veciño de Vilarmaior.
Outros dos galardóns recoñeceron a Arai, un pointer de Sada pertencente a Rubio, na categoría de Caza Menor de Pluma, e a Terri, un beagle de Raúl, de Paderne, como o máis destacado en Caza Menor de Pelo.
Ademais, o mellor lote de cans foi para un grupo de anglo-franceses denominado Papa, Roma, Bonita e Pequeña, de Josacho da Laracha. A mellor camada foi para uns Grifóns Azuis de Gascuña, propiedade de Pedro, do propio concello de Abegondo.
