A convocatoria, publicada no Boletín Oficial da Provincia da Coruña, establece un período de dez días hábiles para que as formacións interesadas presenten as súas solicitudes. O certame desenvolverase os días 4 e 5 de setembro no auditorio do Parque da Igrexa.
Un xurado especializado será o encargado de avaliar as actuacións en directo, que terán unha duración máxima de 30 minutos. Valoraranse criterios como a calidade técnica, a posta en escena, a orixinalidade das propostas e o uso da lingua galega, entre outros factores.
As cinco bandas gañadoras terán a oportunidade de compartir escenario con artistas consolidados na XXXIV edición do festival, que se celebrará os días 25 e 26 de setembro. O cartel deste ano inclúe nomes como Medina Azahara, Boikot, Biznaga, Carlangas e Me Fritos and the Gimme Cheetos.
Poderán participar grupos de pop, rock ou fusión cun máximo de oito integrantes, sempre que polo menos unha persoa estea empadroada no municipio desde hai un ano. As inscricións formalizaranse a través dos rexistros municipais ou os medios administrativos habituais.
