A Semana Clásica en María Pita continúa hoxe coa actuación da Orquestra Sinfónica de Galicia. Presentarán un programa con forte inspiración española e pezas de firma galega, como Ruada. O concerto terá lugar na Praza de María Pita ás 21.00 horas.
A Feria do Libro Antigo e de Ocasión, nos Xardíns de Méndez Núñez, abre as súas portas dende as 10.30 horas. É unha oportunidade para atopar exemplares de interese, dende revistas antigas a clásicos e libros para coleccionistas.
O festival BeatOut Week, centrado en músicas emerxentes do xénero urbano, chega ao seu fin no Anfiteatro do Parque de Santa Margarita. A partir das 18.30 horas, actuarán Akriila, El Bugg, e os DJ Fukai Club, Lg1do e Yapi.
Os barrios tamén celebran as súas festas. Pedralonga festexa o seu día grande no aparcadoiro da Fábrica de Armas dende as 17.00 horas, con actividades infantís, churrascada popular, verbena e fogos artificiais.
Pola súa banda, A Sagrada Familia remata as súas celebracións cunha pulpeira a prezos populares e concertos, incluíndo a actuación de Maghúa Cantareiros. As actividades comezan ás 13.00 horas na pista polideportiva do barrio.
