O proxecto, incluído no Plan de Barrios 2025-2027, busca mellorar a calidade de vida da cidadanía na zona.
As actuacións contemplan a execución de pavimentos peonís con firmes diferenciados para mellorar a accesibilidade, a renovación da calzada, a implementación dunha nova rede de pluviais, a renovación de tramos da rede de saneamento e a modificación da canalización de iluminación.
Tamén se ampliará a beirarrúa fronte ao paso de peóns para mellorar a visibilidade dos viandantes ao cruzar a calzada. Ademais, disporase novo mobiliario urbano nas zonas peonís e prantarase arboredo onde sexa posible, reforzando a seguridade coa adecuación da sinalización viaria.
Este proxecto súmase a outra humanización xa adxudicada no barrio, na rúa Agra do Orzán, cun investimento superior aos 200.000 euros.
O concelleiro de Infraestruturas, Jesús Celemín, destacou o compromiso do goberno coa transformación do barrio, buscando unha cidade máis verde e cómoda.
Estas obras forman parte do Plan de Barrios 2025-2027, que mobiliza máis de 81 millóns de euros en investimentos na cidade.
