A sección primeira da Audiencia Provincial da Coruña ratificou a decisión do Xulgado de Instrución número 2 de Ferrol, que en decembro do ano pasado xa determinara a ausencia de probas para procesar a Alfonso Villares por un delito de agresión sexual. Esta resolución pon fin ao sumario do caso.
Os maxistrados rexeitaron a solicitude da acusación particular de reabrir a causa para tomar declaración a dúas persoas. Argumentaron que a investigación xa realizada foi “ampla e minuciosa” e que, tanto a xuíza instrutora como o Ministerio Fiscal, non atoparon indicios abondos para continuar co procesamento.
Do actuado despréndese que se practicaron todas as dilixencias pertinentes para o esclarecemento dos feitos investigados, polo que é procedente confirmar o auto de conclusión de sumario.
A sala tamén sinalou que as declaracións solicitadas pola acusación particular, as da condutora e a axudante dunha ambulancia, tiñan un carácter “claramente periférico e prospectivo”. Os xuíces explicaron que pretender que estas persoas puidesen establecer se a sintomatoloxía da denunciante era compatible cun cadro de submisión química carece de solidez, xa que non son especialistas e as súas hipóteses xa foron contraditas por médicos e probas clínicas.
Alfonso Villares dimitiu do seu cargo como conselleiro do Mar en xuño do ano pasado, nunha comparecencia urxente na sede do Goberno galego en San Caetano. Naquel momento, declarou a súa inocencia e afirmou que a dimisión lle permitiría defenderse mellor das acusacións. O presidente da Xunta, Alfonso Rueda, arroupouno publicamente e expresou o seu desexo de que “se faga xustiza canto antes” para que puidese regresar á vida pública. Rueda revelou que coñecía a denuncia contra Villares desde febreiro.
