O prazo de presentación de solicitudes para optar ás 1.140 prazas libres das Escolas Deportivas Municipais (EDM) de cara ao curso 2026-27 abrirase mañá, martes 1 de setembro ás 8.00 horas, e permanecerá aberto ata o vindeiro luns 7 de setembro ás 23.59 horas. As persoas interesadas poderán tramitar as súas peticións a través da Sede Electrónica do Concello.
As EDM son un programa clave do Concello para fomentar a práctica deportiva e os hábitos de vida saudables. A oferta inclúe disciplinas para diferentes grupos de idade, desde nenos e nenas de 6 anos ata persoas maiores de 65 e 80 anos.
A programación para este novo curso conta cunha ampla variedade de modalidades, entre as que se atopan natación, atletismo, bádminton, boxeo, esgrima, judo, tenis, pádel, patinaxe artística, waterpolo, escalada, aikido, bujutsu, ximnasia, ioga, pilates, marcha nórdica, zumba, baile, mantemento e tonificación, entre outras.
O concelleiro de Deportes, Manuel Vázquez, sinalou que "o obxectivo das Escolas Deportivas Municipais é facilitar que persoas de todas as idades poidan incorporar o deporte á súa vida diaria, cunha oferta ampla, accesible e distribuída por diferentes instalacións da cidade". Destacou tamén "o papel do deporte como ferramenta de convivencia, socialización e promoción dunha vida activa", lembrando que a alcaldesa, Inés Rey, xa estableceu no 2019 a promoción do deporte como liña estratéxica do seu Goberno.
As actividades desenvolveranse en diversas instalacións deportivas municipais, incluíndo o Complexo Deportivo Municipal de San Diego, a Piscina Municipal de San Amaro, Riazor, a Cidade Deportiva da Torre, o Barrio das Flores, Os Rosales, Novo Mesoiro, a Sagrada Familia, San Francisco Xabier e a Casa da Auga.
Cada persoa poderá presentar unha única solicitude cun máximo de dúas opcións de actividade por orde de preferencia. As solicitudes presentadas exclusivamente a través da Sede Electrónica do Concello terán como criterio de prioridade o empadroamento na Coruña. A listaxe provisional publicarase o 9 de setembro, a definitiva o 14 de setembro e o sorteo, de ser necesario, o 15 de setembro. A matrícula será do 21 ao 28 de setembro.
Toda a información detallada sobre o proceso e as prazas dispoñibles pode consultarse na páxina web de Deportes da Coruña e nos taboleiros de anuncios das instalacións deportivas municipais, así como no teléfono municipal 010.
