O Concello da Coruña avanza co plan de melloras previsto na contorna da estación intermodal. As obras de reurbanización na Avenida do Ferrocarril, entre a Rolda de Outeiro e a Rúa Xeneral Rubín, foron adxudicadas e contan cun investimento de 1,4 millóns de euros. Esta actuación está cofinanciada con fondos FEDER 2021-2027.
A empresa Canarga executará os traballos, tras presentar a oferta mellor valorada pola Mesa de Contratación. Tívose en conta a redución do prazo de execución, que será dous meses inferior ao estimado, e o incremento en 12 meses do prazo de garantía.
A Xunta de Goberno Local aprobou os trámites necesarios para a posta en marcha desta intervención, que forma parte do Plan de Acción Integrado (PAI) para conectar a Rolda dos Barrios, enmarcado na Estratexia de Desenvolvemento Integrado Local (EDIL) da Coruña.
Os servizos municipais prevén que a reurbanización da Avenida do Ferrocarril estea completada en oito meses desde o inicio das obras. Esta actuación é clave para a remodelación das rúas ao redor da estación intermodal, seguindo a liña xa visible na Avenida da Sardiñeira e no novo vial que conecta coa Avenida de Arteixo.
“"A nova estación intermodal mellorará os servizos de transporte e terá un impacto moi positivo no conxunto da zona, tanto en termos socioeconómicos como de mobilidade. Entendemos que é fundamental que a creación da intermodal contribúa a transformar os barrios lindeiros, a mellorar os espazos públicos da Sardiñeira, Os Mallos e Lonzas. E esa é a liña de acción na que estamos a traballar, co obxectivo de que a avenida do Ferrocarril gañe accesibilidade, máis calidade urbana e máis seguridade viaria no seu conxunto."
