A Axencia de Doazón de Órganos e Sangue (ADOS) lembra a necesidade de doar sangue nas xornadas previas e posteriores á celebración do Día de Galicia, xa que as datas festivas poden provocar unha diminución nas reservas dos grupos sanguíneos. A Axencia subliña que son precisas 400 doazóns diarias para garantir o abastecemento aos hospitais galegos, unha cifra que se mantén nos meses de verán, un período especialmente sensible pola deslocalización dos doantes habituais.
Para facilitar a participación, a ADOS está a desenvolver a campaña “Un alento de vida”, que achegará a doazón a máis de 170 concellos galegos ata finais de agosto, co obxectivo de obter ao redor de 22.000 doazóns de sangue. Esta iniciativa busca destacar a importancia de procurar unha oportunidade de curación para moitos enfermos a través do xesto solidario dos doantes.
Os participantes na campaña de verán recibirán un agasallo, como unha almofada ou un balón de praia. Ademais, instalarase un espazo que simula unha típica terraza de verán, onde os doantes poderán inflar un globo para simbolizar o "alento" que supón unha transfusión para os doentes. A campaña quere chamar a atención sobre a necesidade de doar mesmo durante as vacacións, lembrando a presenza das unidades móbiles en municipios de costa e vacacionais.
A ADOS agradece a colaboración dos galegos e galegas, que sitúan a Galicia como a terceira comunidade autónoma en taxa de doazón a nivel estatal, cun índice de 39 doazóns por cada 1.000 habitantes. Non obstante, reitera a necesidade de colaboración permanente e sinala que, esta semana, precísanse doazóns de todos os grupos sanguíneos, especialmente A Positivo, O Positivo e O Negativo.
As unidades móbiles da ADOS realizarán desprazamentos nos vindeiros días para incrementar a participación. O xoves 23 de xullo estarán en Boimorto, Cantón-Obelisco (A Coruña), Caión e Paiosaco (A Laracha), Fene, Santa Comba, Cervo, O Carballiño, O Grove, Salvaterra de Miño e Tui. O venres 24 de xullo, en Cambre, Carballo, Fene, Noia, Rianxo, Vilalba, O Carballiño, Catoira, Tui e Rúa Barcelona (Vigo). O luns 27 de xullo, en Cuatro Caminos (A Coruña), Praza de Armas (Ferrol), O Porto do Son, Freixo e Cruceiro de Roo (Outes), Corme e Pazos (Ponteceso), Meira, Maceda, Rúa do Paseo (Ourense), Salceda de Caselas, As Travesas (Vigo) e Vilanova de Arousa.
Para máis información, a ADOS dispón do portal web ados.sergas.gal, as redes sociais e o teléfono gratuíto 900 100 828.
