A entidade bancaria renovou por completo a súa sucursal na zona do Obelisco para implementar este novo enfoque. O deseño céntrase no acompañamento personalizado dos usuarios no uso das canles dixitais e de autoservizo, facilitando así as xestións máis habituais.

A nova oficina de Abanca preséntase como un espazo amplo e luminoso, sen barreiras, cun deseño moderno e funcional que busca potenciar a proximidade, a transparencia e o confort dos seus visitantes. Está concibida para ofrecer apoio a particulares, negocios e pemes da principal zona comercial e de servizos da cidade.

O obxectivo principal é axudar os clientes a operar a través da banca móbil e os caixeiros automáticos para realizar operacións cotiás como o pago de recibos, transferencias, ingresos, reintegros ou a alta de tarxetas de transporte, entre outras. A oficina estará aberta ao público en horario de mañá e tarde, de luns a xoves, de 8:15 a 14:00 horas e de 16:30 a 18:15 horas.

Ademais, o centro dispón de equipamento tecnolóxico de vangarda que facilita a interacción co cliente e fomenta a dixitalización e a omnicanalidade. Conta cunha ampla zona de autoservizo dispoñible as 24 horas, equipada con catro caixeiros multifuncionais que permiten realizar operacións en calquera momento, con accesibilidade mellorada grazas a funcionalidades como o menú simplificado ou guiado por voz. Tamén ofrece dispositivos de benvida, wifi gratuíta e tabletas para que o persoal poida atender os clientes en calquera punto da oficina.