A proposta, presentada conxuntamente por Ancoraxe Escénicas e Compañía Morraoconto baixo a dirección de Sara Rey e Rafa R. Martínez, aborda o bombardeo informativo e o control do relato nos medios de comunicación.
O director do Centro Dramático Galego, Fran Núñez, participou onte na entrega do galardón no Espazo Cultural Manuel María da Coruña. O certame combina o apoio á creación cun circuíto de exhibición que facilita o encontro das compañías profesionais co público de diferentes puntos de Galicia. Á axuda económica súmase a garantía de, cando menos, 40 representacións, grazas á colaboración das deputacións, dos concellos e das mostras de teatro participantes.
‘Semente de dramón’ parte do texto homónimo de Manuel María para revisar a farsa con referentes estéticos e conceptuais actuais, empregando unha linguaxe escénica contemporánea que incorpora música, cancións e coreografías.
O xurado valorou a maneira en que a proposta afonda no procedemento satírico de Manuel María a través dun elenco e dun equipo artístico eclécticos, destacando a investigación sobre quen controla o relato nos medios e o alento lúdico da montaxe.
A esta edición colaboran os concellos da Coruña, As Pontes de García Rodríguez, Ames, Arteixo, Barbadás, Betanzos, Brión, Cangas de Morrazo, Cambados, Carballo, Cariño, Carral, Catoira, Cedeira, Culleredo, Melide, Moaña, Monforte de Lemos, Negreira, O Barco de Valdeorras, O Grove, Oleiros, Padrón, Ponteareas, Pontevedra, Rianxo, Ribadeo, Ribeira, Sada, Santiago de Compostela, Tomiño, Verín, Vilagarcía de Arousa e Viveiro.
