O conselleiro de Presidencia, Xustiza e Deportes, Diego Calvo, acompañado da directora xeral de Administración Local, Natalia Prieto, visitou as obras que se están a realizar nestas instalacións deportivas. A achega da Xunta forma parte do apoio a proxectos estratéxicos da convocatoria de 2025, enmarcada no fondo adicional do Fondo de Cooperación Local (FCL).
Esta iniciativa forma parte dunha liña de apoio da Xunta a proxectos estratéxicos que na convocatoria de 2025 e no exercicio anterior financiou case corenta proxectos cun investimento acumulado de máis de 16 millóns de euros. Na convocatoria deste 2026, o orzamento incrementouse ata os 10 millóns de euros.
A actuación en Abegondo busca impulsar iniciativas que melloren servizos municipais e teñan repercusión supramunicipal ou comarcal, neste caso, no ámbito do deporte. As obras inclúen a ampliación do ximnasio e salas de actividades, a renovación do pavimento da pista, a reforma de vestiarios e aseos, a mellora da accesibilidade con ramplas e ascensor, e o incremento da eficiencia enerxética con sistemas de ventilación e bomba de calor.
Diego Calvo destacou a importancia destas actuacións para fomentar a práctica deportiva e o compromiso da Xunta coas entidades locais. Lembrou que Abegondo foi un dos concellos piloto do programa 'Adestra a túa saúde' para maiores de 60 anos, iniciativa que se estendeu a unha vintena de concellos.
O conselleiro tamén subliñou o apoio da Xunta aos concellos galegos, con preto dun milleiro de proxectos impulsados o ano pasado. No caso de Abegondo, a achega de 700.000 euros intégrase nos máis de 1,4 millóns de euros investidos no municipio nos últimos anos.
