A Deputación da Coruña levará a vindeira semana todo o potencial gastronómico da provincia ao Gastronomic Forum Barcelona. A representación coruñesa combinará a alta cociña, recoñecida con dúas estrelas Michelin, con relatorios de harmonía e a excelencia dos produtos de mar, terra e gando local.
Ao longo de tres xornadas, o espazo provincial acollerá exhibicións de cociña en directo, catas de queixos e viños con Indicación Xeográfica Protexida e Denominación de Orixe, así como degustacións diarias con profesionais do sector.
A actividade comezará o luns coa apertura diaria a cargo de Cafés Aruba, San Isidro Bakery e Galegas de Nata. Esa xornada inclúe showcookings de Nair González (Restaurante Muelle 43 e Confraría de Barallobre) e Andrés Torreiro (Restaurante D'Obra). Tamén haberá unha cata vertical de queixos guiada por Óscar Ramil (CRDOP Arzúa-Ulloa) e un taller de harmonías con viños da IXP Terras de Betanzos e porco celta de Cárnicas Domínguez, ademais de degustacións de Empanadas Ternura da Coruña. Na Sala Taller, o chef Manuel Costiña (Restaurante Retiro da Costiña), con dúas estrelas Michelin, impartirá o relatorio-degustación "Unha viaxe da cociña familiar á alta gastronomía", destacando o polbo de Lira, a pataca de Coristanco e a carne de raza cachena.
O martes continuarán os showcookings de Víctor Basante (Restaurante Arrueiro) e novas sesións de Nair González sobre empanada de navallas. A xornada inclúe un taller de harmonías entre viños da D.O. Rías Baixas María Manuela, queixo Galmesán e patacas fritidas Bonilla a la Vista, ademais de presentacións de Conserveira de Ribeira e produtos de porco celta de Cárnicas Domínguez.
O mércores pecharase o programa coas propostas de Mar Lago e Álex Martínez (Restaurante Bacelo), e Nair González. Alejandro Paadín conducirá un último taller de harmonías con viños da IXP Barbanza e Iria e patés tradicionais da Conserveira de Ribeira.
O vicepresidente da Deputación, Xosé Regueira, subliñou que "a presenza no Fórum de Barcelona é unha oportunidade inmellorable para amosar a enorme calidade da nosa despensa e o talento dos nosos cociñeiros. Queremos trasladar a esencia da nosa paisaxe a través do sabor, demostrando que a provincia da Coruña é un referente gastronómico de primeiro nivel onde a tradición e a innovación van da man para xerar valor no noso territorio e no sector turístico".
