A Facultade de Relacións Internacionais do campus de Ourense celebrou este venres unha xornada sobre saídas profesionais do seu grao. A actividade contou co apoio do Consello Social da Universidade de Vigo e a participación dunha egresada da súa primeira promoción (2022-2026), Nieves Bouzas Kabundi, técnica de apoio en proxectos internacionais da consultora ICSEM.
Na apertura, Laura Carballo, decana da facultade, destacou o orgullo de contar xa coa primeira promoción e con egresados que inician a súa carreira. Nieves Bouzas trasladou ao alumnado a súa experiencia e punto de vista sobre o mundo laboral tras catro anos de carreira, recoñecendo as dúbidas e medos comúns neste paso. Explicou que optou por traballar despois de realizar as prácticas do grao nunha consultoría de sostibilidade en Vigo, onde foi contratada tras unha bolsa.
Tamén participou Mar Rodríguez, subdirectora xeral de Relacións coa UE da Dirección Xeral de Relacións Exteriores e coa UE (Consellería de Presidencia, Xustiza e Deportes). Achegou ao alumnado as oportunidades profesionais no sector público, especialmente en Galicia, destacando que as comunidades autónomas tamén son actores internacionais. Mencionou bolsas da Fundación Galicia-Europa, institucións europeas e o acceso á función pública na UE.
A primeira promoción do Grao de Relacións Internacionais da UVigo graduouse o pasado 29 de maio. O título, iniciado no curso 2022/2023, é un dos graos con nota máis alta de acceso na Universidade de Vigo e no Sistema Universitario de Galicia. É un grao interuniversitario, con dous primeiros cursos comúns co campus de Ferrol (Universidade da Coruña), e especializacións diferenciadas en terceiro e cuarto, sendo a de Ourense a de Xestión de Proxectos e Negocios Internacionais. É trilingüe (galego, español e inglés), co 50% da docencia en inglés.
