O Consorcio de Turismo e Congresos da Coruña abordará este venres a aprobación da licitación de cinco novas rutas aéreas desde o aeroporto de Alvedro e dun convenio de colaboración con Inditex. Esta iniciativa, froito da colaboración institucional entre o Concello da Coruña, o Consorcio de Turismo e a compañía galega, busca mellorar e consolidar o posicionamento da cidade como destino turístico, empresarial e congresual.
A nova licitación inclúe cinco lotes correspondentes ás conexións directas con Málaga, Valencia, Bilbao, Sevilla e Alacante. O contrato terá unha duración inicial de tres anos, con posibilidade de prórroga, e o Concello investirá máis de 6,5 millóns de euros nesta iniciativa para garantir a operatividade das rutas e o desenvolvemento de campañas de promoción.
A alcaldesa, Inés Rey, destacou que "a mellora da conectividade aérea é unha cuestión estratéxica para o futuro da cidade porque nos permite atraer visitantes, facilitar as relacións empresariais e ampliar as oportunidades de mobilidade para a cidadanía". Sinalou que as conexións directas favorecen a actividade económica, o turismo, os intercambios profesionais e contribúen a facer da Coruña unha cidade máis aberta e competitiva.
A actuación enmárcase na estratexia municipal de apoio ao aeroporto de Alvedro e á ampliación da súa rede de destinos. Os pregos da licitación establecen accións de promoción turística vinculadas ás rutas, incluíndo campañas de publicidade, accións en redes sociais e viaxes de familiarización para profesionais do sector.
As novas rutas previstas son: A Coruña - Málaga (208 voos anuais e 37.440 prazas), A Coruña - Valencia (208 voos anuais e 37.440 prazas), A Coruña - Bilbao (180 voos anuais e 32.400 prazas), A Coruña - Sevilla (entre 288 e 352 voos anuais e ata 63.360 prazas), e A Coruña - Alacante (entre 146 e 180 voos anuais e ata 32.400 prazas).
Na mesma Xunta de Goberno debaterase tamén un convenio coa multinacional Inditex, mediante o cal a empresa achegará 1,5 millóns de euros para a promoción turística da cidade durante os anos 2026 e 2027, prorrogable un ano máis. Tras a sinatura, convocaranse novas rutas internacionais.
Inés Rey puxo en valor a cooperación público-privada, afirmando que "a colaboración con Inditex volve demostrar que cando institucións e empresas traballan na mesma dirección somos capaces de impulsar iniciativas que xeran valor para toda a Coruña".
