O evento reunirá preto de 170 deportistas procedentes de Galicia, Asturias, Cantabria e Castela e León, e forma parte do Sector Oeste do Campionato de España Absoluto 2026. Entre os participantes atópanse 58 deportistas galegos, dos cales 24 son da Coruña e a súa área metropolitana.
Organizado pola Federación Galega de Judo e a Real Federación Española de Judo, co patrocinio do Concello da Coruña, o torneo busca clasificar judokas para a fase final do campionato nacional, abrindo portas ao circuíto internacional.
O concelleiro de Deportes, Manuel Vázquez, destacou a consolidación do trofeo na cidade e o traballo do Concello para converter A Coruña nun referente deportivo, apoiando tanto o deporte base como as competicións de alto nivel.
A xornada comezará ás 9.30 horas no Palacio dos Deportes de Riazor, coas finais previstas para as 13.00 horas e a entrega de trofeos ás 13.30 horas. A entrada será gratuíta e espérase unha asistencia duns 800 espectadores. A competición tamén se poderá seguir en directo pola canle de YouTube da Federación Galega de Judo.
