A cidade da Coruña converterase no epicentro da eclipse total de sol en Galicia na semana do 12 de agosto de 2026. Aproveitando este evento astronómico, a urbe herculina albergará entre os días 10 e 14 de agosto o congreso 'New Frontiers in Cosmology —Cosmoloxía baixo a totalidade—'. Este encontro científico situará A Coruña no mapa internacional da investigación cosmolóxica coa participación de oito recoñecidos relatoras e relatores de prestixio, procedentes de institucións de referencia como as universidades de California-Berkeley, Harvard e Princeton.
Entre as participantes atópase Minia Manteiga, astrofísica galega e unha das organizadoras. A investigadora do CITIC destaca que o congreso supón “unha ocasión moi boa para dar visibilidade non só á eclipse, senón tamén á astronomía na cidade”, xa que atraerá a investigadoras, investigadores e estudantes de cosmoloxía de todo o mundo. O encontro está organizado pola Universidade da Coruña (UDC), a Fundación Simons e o Berkeley Center for Cosmological Physics, por iniciativa do investigador posdoutoral de orixe galega Antón Baleato Lizancos.
O congreso busca dar a coñecer os avances máis recentes neste campo da ciencia a nivel internacional. A elección da Coruña como sede tamén responde á existencia dun núcleo de investigación astronómica de relevancia. Xunto ao programa científico, o evento incluirá actividades de divulgación abertas ao público en colaboración con institucións locais, co obxectivo de ampliar o impacto social e converter a cidade nun referente internacional da astronomía.
Segundo explica Antón Baleato, haberá 250 participantes procedentes dos centros de investigación máis importantes, incluíndo membros da National Academy of Sciences dos Estados Unidos e galardoados con premios como o Breakthrough ou o Shaw. Oito relatores protagonizarán os catro días de congreso, entre eles Daniel Anglés-Alcázar (Universidade de Connecticut), José Luis Bernal (Instituto de Física de Cantabria), Carolina Cuesta-Lázaro (Harvard e MIT), José Edelstein (IGFAE), Julián Muñoz (UT Austin) e Francisco Villaescusa-Navarro (Universidade de Princeton), ademais dos impulsores Antón Baleato Lizancos e Minia Manteiga.
As xornadas abordarán cuestións clave sobre a materia escura e a enerxía escura, temas abertos en cosmoloxía nos que as investigacións recentes permiten contrastar novas teorías. A Fundación Simons tamén apoia a participación de investigadores mozos, cubrindo gastos de viaxe e aloxamento para facilitar a súa asistencia á Coruña.
O congreso tamén busca promover o turismo na Coruña, destacando a súa contorna natural, riqueza cultural e gastronómica. O evento aspira a mostrar un turismo diferente, máis aló do sol e praia, e a converter a cidade nun destino atractivo para os congresistas.
A eclipse terá lugar o 12 de agosto arredor das 20:30 horas. A organización non programou charlas nese momento para permitir a observación do fenómeno. Ante posibles cambios meteorolóxicos, reserváronse autobuses para trasladar aos asistentes a outras localizacións da provincia se a nubosidade na Coruña o impide, buscando garantir a mellor visibilidade posible.
Minia Manteiga cualifica o congreso como “un legado cultural para a cidade”, que xunto a outros eventos arredor das eclipses, xerará un importante movemento científico e cultural. O obxectivo é tamén espertar vocacións científicas, especialmente entre a xente máis nova, achegando unha visión positiva para A Coruña.
