Entre o 20 e o 22 de xullo de 2026, celebrarase o congreso Cellular Aging and Metabolism Symposium 2026 (CAMS2026) no Salón de Actos da Facultade de Ciencias da Saúde (Oza). Este evento reunirá a investigadores/as internacionais de primeiro nivel para fomentar a discusión científica, a presentación de resultados e o establecemento de novas colaboracións no campo do envellecemento e o metabolismo celular.
Ademais, o 20 de xullo, terá lugar unha sesión satélite aberta ao público baixo o título “Envellecemento e Calidade de Vida” no Café de Macondo. O obxectivo desta actividade é achegar a investigación sobre o envellecemento á sociedade e promover un debate sobre como a ciencia pode contribuír a mellorar a saúde e a calidade de vida durante esta etapa vital.
A sesión satélite estará moderada por Sandra Rego Rey (CICA, A Coruña) e contará coa participación de recoñecidos expertos como Cleo Bishop (Queen Mary University of London, Reino Unido), presidenta da International Cell Senescence Association (ICSA); Estela Area Gómez e Ignacio Benedicto (CIB-CSIC, Madrid); M. Carmen de Andrés (INIBIC, A Coruña); e a propia Sandra Rego Rey.
Estes investigadores achegarán diferentes perspectivas sobre os mecanismos biolóxicos do envellecemento, a súa relación coa saúde e os retos para promover un envellecemento saudable. O formato será dinámico e participativo, con espazo para preguntas e debate co público asistente.
A inscrición para o congreso CAMS2026 é gratuíta e realízase en liña a través da web oficial do evento ([https://www.cams2026.com/](https://www.cams2026.com/)). Os interesados en presentar resumos de abstracts poden contactar a través do correo electrónico: contact@cams2026.com.
