O Concello da Coruña, a través da Casa das Ciencias, promove unha programación cultural especial de cara á próxima eclipse solar do 12 de agosto. Dentro desta iniciativa, o planetario acolle a proxección do documental inmersivo «3CLIPSE», creado para divulgar este fenómeno astronómico.
A produción, dispoñible ata o 31 de agosto, ofrece dúas sesións diarias con case 160 prazas. As proxeccións son ás 13:00 horas en castelán e ás 19:00 horas en galego. O filme foi estreado o pasado 26 de xuño en trinta e cinco planetarios, museos e centros de ciencia de España e Portugal.
O concelleiro de Cultura e Turismo, Gonzalo Castro, destacou que a cidade será un lugar privilexiado para presenciar a eclipse, e que o Goberno municipal quixo reforzar as accións educativas e divulgativas para facer deste evento algo inesquecible.
«3CLIPSE» é un proxecto coordinado polo Museo Elder de la Ciencia y la Tecnología e coproducido polo Concello da Coruña a través dos Museos Científicos, coa colaboración da Fundación Española para a Ciencia e a Tecnoloxía (FECYT). O filme, dirixido por Fernando Jáuregui, conta coa participación do estudo de animación Antaruxa e técnicos dos Museos Científicos como Bibiana García Visos e Marcos Pérez Maldonado.
A experiencia inmersiva, pensada para público a partir de dez anos, combina divulgación científica e narrativa visual. A través da historia dunha nena e a súa avoa, o documental explora a relación entre o ser humano e as eclipses, o seu significado cultural e a fascinación que seguen a espertar.
Ademais das proxeccións, a iniciativa ofrece na súa web unha exposición descargable, unha guía didáctica e diversos recursos educativos.
Ante a previsión de desprazamentos pola eclipse, que coincide co Trofeo Teresa Herrera, a alcaldesa, Inés Rey, informou sobre os preparativos do Concello. Prevese un dispositivo especial de seguridade con máis de 300 efectivos, reforzo do transporte urbano e a posta en marcha de aparcadoiros disuasorios nos campus universitarios da Zapateira e Elviña.
O día da eclipse haberá unha liña especial de transporte urbano que conectará o campus da Zapateira coa praza de Pontevedra, ademais de reforzos nas liñas habituais e na liña 3-A. Os accesos ao Portiño e ao Monte de San Pedro serán a pé.
Os servizos municipais tamén identificaron múltiples enclaves de proximidade nos barrios para observar a eclipse, xeolocalizados nun visor interactivo na páxina web do Concello.
